Trajneri i Shqipërisë, Silvinjo foli në konferencë për shtyp, në prag të ndeshjeve të “play off”.
Tekniku kuqezi, u shpreh se ende nuk di gjendjen e Brojës, kur u pyet për sulmuesin kryesor, ndërsa theksoi se Muçi dhe Mehmeti janë lojtarë që shënojnë.
“Nuk duhet të qahemi. Të shohim përpara. Kam besim te lojtarët që kam grumbulluar. Për këtë kemi menduar prej kohësh. Duhet të përshtatemi me situatën. Muçin e shoh si sulmues. Në fushë, ai është një lojtar që shënon, e gjen portën, ka tipare ofensive dhe më pak defensive. Mehmetin e kemi sjellë ne në Kombëtare. Është një lojtar që gjatë këtyre viteve është rritur dhe përmirësuar shumë. Unë e shoh si lojtar krahu. Të dy janë lojtarë që e gjejnë portën. Kur nuk ke sulmues të mirëfillte, duhet të gjesh lojtarë që shënojnë. Lojtari që ka shënuar më shumë në Kombëtare gjatë këtyre viteve, është Nedim Bajrami, pas tij Asani dhe Asllani. Jo domosdoshmërish duhet një sulmues 9. Janë lojtarë që mund të bëjnë mirë.
Kemi kohë që jemi pas Pilo. Aliji ka pasur një ndërhyrje kirurgjikale dhe ka bërë mirë me Kombëtaren. Duhet ta shikojmë dhe ta vlerësojmë. E shoh si mundësi që iu jepet lojtarëve.
Sa i përket Brojës si sulmues qendre. Ka kohë jashtë. Nuk e di ende. E lidh me vlerësimin që duhet të bëjmë. Nuk e di gjendjen ende. Do i vlerësojmë kur të vijnë në grumbullim. Është e rëndësishme që në fushë të hyjnë ata lojtarë që të vënë kundërshtarin në vështirësi. Edhe ata që futen nga stoli, mund të bëjnë diferencën.”
