Në këtë sezon, Vllaznia ka zgjedhur të kufizojë daljet publike të lojtarëve dhe stafit të saj.
Përjashtim kanë bërë vetëm konferencat zyrtare dhe komentet pas ndeshjeve të kampionatit. Nuk bëhet fjalë për ndonjë raport të ftohtë me mediat, pasi marrëdhëniet mes palëve mbeten normale.
Kjo strategji lidhet më shumë me qasjen e trajnerit Martini, i cili nuk e preferon ekspozimin e shpeshtë. Ai ka zgjedhur të mbajë një profil më të mbyllur, duke shmangur presionin dhe deklaratat e panevojshme. Vendimi i trajnerit është i prerë, duke mos lejuar lojtarët të dalin në media.
Megjithëse skuadra është përforcuar dhe shihet si pretendent për objektiva të lartë, nuk është artikuluar hapur synimi për titullin. Aktualisht, komunikimi publik bëhet me shumë kujdes dhe në mënyrë të kufizuar.
