FIFA ka dhënë një dënim, të rëndë për Skënderbeun, duke i bllokuar merkaton. Nga dita e sotme, skuadrës korçare i është bllokuar zyrtarisht e drejta për të kryer transferime të lojtarëve të rinj në tregun e merkatos. Ky sanksion i vendosur nga FIFA do të mbetet në fuqi deri në momentin që drejtuesit të shlyejnë të gjitha detyrimet e prapambetura financiare.
Deri më tani, detajet specifike dhe çështja gjyqësore e humbur nga ana e klubit bardhekuq nuk janë bërë ende publike. Ky vendim vjen në një moment delikat, kur skuadra po përgatitej për rikthimin e saj në elitën e futbollit shqiptar.
Skënderbeu do të jetë pjesë e Kategorisë Superiore për edicionin e ardhshëm, pas një rrugëtimi pozitiv në Kategorinë e Parë. Ekipi e mbylli kampionatin në vendin e dytë të renditjes së përgjithshme, duke siguruar ngjitjen direkte.
Titulli kampion u humb vetëm në fund, pikërisht gjatë përballjes direkte me rivalët e Laçit. Sanksioni i mbrojtjes ligjore përbën një problematikë të madhe për stafin teknik, duke qenë se vjen vetëm pak javë përpara hapjes së dritares së transferimeve.
Në planet fillestare të klubit ishin parashikuar ndryshime të shumta në organikë për të ndërtuar një grup konkurrues për Kategorinë Superiore.
