Thomas Strakosha është padyshim një nga pikat kyçe tek AEK-u këtë sezon. Portieri shqiptar i ka mahnitur të gjithë, duke mbajtur portën e paprekur plot gjashtë herë, në nëntë ndeshje të zhvilluara. Nëse përfshijmë edhe ndeshjen e Shqipërisë ndaj Letonisë, atëherë ai numëron plot shtatë ndeshje pa pësuar.
Pas një sezoni të vështirë vitin e kaluar, 30-vjeçari ka treguar përmirësim të dukshëm në nivel individual. Në ndeshjen ndaj Levadiakos, Strakosha u dallua me ndërhyrje vendimtare ndaj Palacios dhe Verbic, duke ndihmuar ekipin të ruante rezultatin.
Pas kritikave të shumta të marra një sezon më parë, këtë edicion Strakosha duket totalisht ndryshe.
Shifrat tregojnë përmirësim të ndjeshëm për shqiptarin. Sipas shifrave ai përballet me mesatarisht 3,28 gjuajtje në portë dhe realizon 2,84 pritje, shumica prej tyre që kërkojnë reagim të shpejtë. Ndeshja e tij më e spikatur ka qenë kundër Anderlecht në Bruksel, ku regjistroi 10 pritje dhe shmangu 3 gola të sipas statistikave të avancuara.
Kjo paraqitje ndikoi në rritjen e besimit të tij, duke vijuar më pas me katër ndeshje radhazi pa pësuar gol. Përveç këtij progresi, Strakosha ka treguar përmirësim edhe në lojën me këmbë, duke pasur afro 70% saktësi në pasimet e gjata, kundrejt 65,6% që kishte sezonin e kaluar. Këto elemente e kanë kthyer atë në një nga shtyllat e AEK-ut në fillim të këtij edicioni.
Marrë nga TvKlan.al
