Vllaznia ka marrë një lajm në pragndeshjen me Vikingur. Gazeta “Shkodra Sport” raporton se dy lojtarët ganezë të saj, Alfred Mensah dhe Charles Bismark i kanë marrë më në fund vizat dhe nesër do të udhëtojnë bashkë me ekipin për në Islandë, aty ku mbrëmjen e së enjtes do të luajnë ndeshjen e kthimit të turit të dytë të “Uefa Europa Conference League” ndaj skuadrës vendase.
LEXO EDHE: EKSKLUZIVE/ Zbulohet ku do të transmetohen ndeshjet e tre skuadrave shqiptare në Europë
Në fakt prania e tyre në këtë ndeshje u vu seriozisht në rrezik sepse drejtuesit e Vllaznisë po hasnin pengesa të shumta për sigurimin e vizave të tyre, por gjithçka u zgjidh me ndërhyrjen e Taulant Ballës. Ky i fundit është angazhuar maksimalisht ditët e fundit për zgjidhjen e këtij problemi dhe ia ka dalë.
Duhet thënë se Balla është shumë aktiv pranë futbollit shqiptar kohët e fundit dhe këtë e demostron edhe me postimet e herëpashershme për futbollistët dhe ekipet tona dhe së fundi ka mundësuar edhe vizat për dy lojtarët e Vllaznisë, çka është një bonus jo i vogël për skuadrën shkodrane në prag të këtij takimi shumë të rëndësishëm.
E rëndësishme është që Bismark dhe Mensah do të jenë në dispozicion të trajnerit Martini për ndeshjen e së enjtes, ku Vllaznia do të synojë arritjen e saj më të madhe në arenën ndërkombëtare, kualifikimin për herë të parë në turin e tretë të Kupave të Europës.
