Flamurtari dhe Teuta u ndanë në barazim 2-2 të premten, në ndeshjen e vlefshme për javën e 17-të të Superiores. Takimi u shoqërua edhe me incidente pas përfundimit të lojës.
Disa tifozë vendas hynë në fushë, duke krijuar tension me lojtarët e Teutës. Ngjarja ndërpreu për pak momente normalitetin e aktivitetit sportiv. Së fundmi, klubi i Flamurtarit publikoi pamje shtesë nga incidenti. Në reagimin zyrtar, klubi u distancua nga ngjarja dhe theksoi përgjegjësitë e organizimit.
Flamurtari i bëri thirrje Teutës që të mos abuzojë me situatën dhe të fokusohet te loja në fushë. Gjithashtu, u deklarua se do të vihen në dispozicion pamje që tregojnë sjellje jo sportive gjatë ndeshjes.
REAGIMI:
Duke u distancuar nga ngjarja dhe duke marrë përsipër përgjegjësitë e organizimit të garës, ftojmë Klubin e Teutës të mos abuzojë me këtë situatë dhe të fokusohet te futbolli i pastër në fushë, i luajtur nga futbollistët si një shfaqje për spektatorët, pa ndërhyrje të treta nga jashtë. Për këtë arsye, vëmë në dispozicion një pjesë të akteve të dhunës të ushtruara nga lojtarët dhe stafi i Teutës, si edhe sjelljet jo sportive të evidentuara gjatë kësaj ndeshjeje.
