Klubi i Tiranës ka siguruar afrimin e mesfushorit boshnjak Rijad Kobiljar për pjesën e mbetur të sezonit, një lëvizje që vjen pak ditë para derbit me Partizanin.
29-vjeçari vjen në kryeqytet për të mbushur boshllëkun e lënë nga Freddy Alvarez. Ish-lojtari i Olimpija Ljubljana shihet si njeriu që do të mbajë peshën e mesfushës bardheblu.
Kobiljar ka një karrierë të pasur, ku spikat titulli kampion i fituar në elitën e futbollit slloven. Së fundmi, ai ka qenë pjesë e Sakaryaspor në Turqi, duke treguar formë të mirë fizike.
Mesfushori shquhet për vizionin e tij të lojës dhe qetësinë që përcjell në organizimin e aksioneve. Drejtuesit e Tiranës shpresojnë që eksperienca e tij europiane të ndihmojë ekipin për të shpëtuar sezonin.
