Trajneri i Burnley, Scott Parker, sqaroi lënien jashtë të Armando Brojës, për sfidën e parë të kampionatit ndaj Tottenham.
Ai deklaroi se sulmuesit i duhet pak më shumë punë, pasi nuk ka bërë shumë përgatitje gjatë verës, për të qenë gati për të luajtur në Premier League.
Parker theksoi se nuk dëshiron të rrezikojë që në fillim me shqiptarin, pa kapur formën optimale.
“I duhet pak më shumë punë. Nuk ka bërë shumë përgatitje që të mund të luajë në Premier League, ndaj na duhet ta trajtojmë me kujdes dhe ta çojmë në ritmin e duhur.
Unë nuk dua të ngutem me asgjë për të dhe që ai të jetë pastaj në rrezik ndaj ndonjë gjëje këtu. Përtej kësaj, ai sapo ka ardhur në ekip, praktikisht duhet të jesh në formën optimale fizikisht.
Do të bëjmë pak punë me të. Ai qëndroi jashtë sot dhe ka bërë punë ekstra përgatitore, të shohim se ku do të jemi me të në javën e ardhshme”, tha Parker.
