Trajneri i Serbisë, Dragan Stojkovic, doli në konferencë për shtyp në prag të ndeshjes kundër Shqipërisë, ku foli për përgatitjet dhe situatën aktuale të ekipit të tij.
Ai konfirmoi se Serbia po përballet me disa mungesa për shkak dëmtimesh, çka e vështirëson përgatitjen për këtë sfidë. Një pjesë e rëndësishme e deklaratës së tij lidhej me kapacitetin e stadiumit të Leskovcit, ku do të zhvillohet ndeshja.
Përballja u zhvendos nga Beogradi në Leskovc për arsye sigurie, me qëllim shmangien e incidenteve. Pas vendimit të FIFA-s për të reduktuar me 20% numrin e vendeve në stadium, u raportua se në takim do të lejoheshin rreth 6.500 tifozë.
Megjithatë, Stojkovic sqaroi se shifra reale do të jetë më e ulët. “Në stadium do të jenë vetëm 5.000 tifozë”, tha ai, duke konfirmuar se informacionet paraprake nuk ishin të sakta. Trajneri shtoi se nuk ishte ai që vendosi për zhvillimin e ndeshjes në Leskovc, por Federata Serbe e Futbollit.
