Futbollisti 18-vjeçar Bruno Petrone, aktualisht pjesë e ekipit të Angrit, u godit me thikë gjatë natës në lagjen Chiaia të Napolit.
Sipas raportimeve, ai u sulmua nga pesë persona ndërsa qëndronte mbi skuterin e tij së bashku me një mik. Pas ngjarjes, i riu u transportua me urgjencë në spitalin San Paolo, ku iu nënshtrua një operacioni për heqjen e shpretkës.
Gjendja e tij mbetet e rëndë dhe ai po trajtohet në njësinë e kujdesit intensiv nën mbikëqyrje mjekësore. Lidhur me sulmin, një 15-vjeçar u dorëzua vullnetarisht në polici, i ndjekur më pas nga katër persona të tjerë të moshës 17 vjeç.
Autoritetet kanë arrestuar katër prej tyre, ndërsa personi i pestë është liruar me akuzë në pritje të gjykimit. Hetimet vazhdojnë për të përcaktuar motivin e saktë, ndonëse pamjet filmike sugjerojnë një sulm të planifikuar ndaj sportistit. Policia po punon për zbardhjen e plotë të rrethanave të kësaj ngjarjeje.
