Barcelona fitoi me rezultatin 6-1 ndaj Olympiacos në ndeshjen e vlefshme për raundin e tretë në Champions League. Takimi u zhvillua në “Estadi Olímpic Lluís Companys”, ku katalanasit dominuan gjatë gjithë lojës.
Megjithatë, vëmendjen kryesore e mori një episod në minutën e 57-të, kur lojtari i skuadrës greke, Hezze, u përjashtua me karton të kuq pas marrjes së të dytit të verdhë. Vendimi erdhi pas një kontakti minimal të dorës së tij me fytyrën e lojtarit të Barcelonës, Casado.
Arbitri Urs Schnyder u konsultua me sistemin VAR, ndonëse rasti nuk përfshinte një faull për karton të kuq direkt, çka ka ngritur pikëpyetje mbi përdorimin e teknologjisë në këtë rast.
Situata ka shkaktuar reagime të shumta në rrjetet sociale dhe kritika ndaj mënyrës së arbitrimit. Nga tifozë të shumtë Barcelona akuzohet për blerje të arbitrave, për shkak të vendimeve të marra në fushë.
Klubi grek pritet të apelojë vendimin, ndërsa UEFA ende nuk ka dhënë asnjë qëndrim mbi mundësinë e ndëshkimit të arbitrit zviceran.
