Ndeshja mes Milanit dhe Romës është shoqëruar me një episod të pazakontë në fundin e saj, në momentin kur skuadra verdhekuqe kishte mundësinë të shënonte nga penalltia.
Pas gabimit të Dibalës nga pika e bardhë, i ndalur nga portieri Menjo, lojtari i Milanit, Salmekers, u pa duke festuar me entuziazëm. Në ato momente, gjyqtari kryesor Marko Guida iu afrua lojtarit dhe u duk se e goditi me shkelm nga pas.
Episodi është komentuar gjerësisht në mediat italiane dhe nga ekspertë të arbitrimit. Ish-gjyqtari ndërkombëtar italian, Graciano Çezari, e cilësoi veprimin e Guidës si të pakuptimtë dhe të papërshtatshëm për një arbitër me stemën e FIFA-s.
Ai theksoi se, në rast festimesh të tepruara, lojtari mund të ndëshkohet me karton të verdhë, por jo të ketë reagime fizike nga gjyqtari. Çezari shtoi se veprimi i Guidës dukej i qëllimshëm, pasi ai i afrohet qëllimisht lojtarit, ndërsa Salmekers shihet duke reaguar dhe e akuzon për gjestin.
