Trajneri i Egnatias, Edlir Tetova, rrallëherë flet kundër gjyqtarëve në deklaratat pas ndeshjeve. Por pas sfidës së sotme kundër Vllaznisë, të humbur me shifrat 1-0, tekniku i rrogozhinasve foli dukshëm i acaruar me gjykimin e kryesorit Florian Lata.
“Sa i përket lojës, mendoj se është penallti në pjesën e parë. Te rasti i Ruçit, nuk ka informacion për topin dhe çuditërisht nuk ka penallti. Dhe rasti i golit, nuk shihet në VAR. Nuk po them shumë larg trajektores, por është larg. Çuditërisht anulohet. Nuk e di pse janë këto situata ndaj nesh. Fundi është Vllaznia, Egnatia, duam të luajmë futboll. Si meriton Vllaznia, duam edhe ne situatat tona”, ishin fjalët e Tetovës pas sfidës.
Rasti i parë që i referohet Tetova është ai i pjesës së parë ku pas një dyluftimi në zonën shkodrane, Çelikoviç rrëzohet dhe pastaj godet Ruçin ndaj të cilit po shkonte topi. Një episod për të cilin Tetova kishte edhe një diskutim me kryesorin Lata i cili shkoi t’ia shpjegonte pranë pankinës.
Sa i përket rastit të dytë, është ai i golit të shënuar nga Buriç, që u anulua nga kryesori i ndeshjes. Në momentin e gjuajtjes së sulmuesit, Albaneze ishte dukshëm në pozicion jashtë loje para portierit, por sipas Tetovës, nuk ishte ndikuar në mënyrë direkte te trajektorja e topit dhe fushëpamja e portierit.
Dy episode dhe një deklaratë e cila duket se po ndez që në startin e pjesës së dytë të kampionatit, ku çdo pikë bëhet thelbësore me formulën e re.
