Sulmuesi nigerian i Vllaznisë, Çarls Bismark, u rikthye në Shkodër pas një përplasje të madhe që pati me kompaninë e menaxhimit që zotëronte të drejtat e tij.
Sipas “Rubrika Sportive” Skënderbeu, klubi që ka nën kontratë Bismarkun, kishte rënë dakord me Dinamon për shitjen e lojtarit, nga ku do të përfitonte 150 mijë euro nga blutë. Vetë Bismark kishte rënë dakord me Dinamon për një pagë prej 6 mijë eurosh në muaj.
Mirëpo, në mes ishte kompania e menaxhimit, që kërkonte një komision të madh nga Dinamo për këtë transferim dhe në fund klubi blu hoqi dorë, paçka se kishte arritur akordin me lojtarin dhe Skënderbeun.
Në këto kushte, klubi korçar pranoi ta huazonte Bismarkun sërish në Shkodër. Tashmë te Vllaznia po ia shohin hajrin kësaj marrëveshjeje, ndërsa Bismark ka nxituar të ndryshojë menaxherët, pasi i druhet precedentit me Dinamon.
