Pas përfundimit të javës së 21-të të Kategorisë Superiore, stoli i Partizanit dhe ai i Teutës pritet të pësojnë ndryshime.
Oltijon Kërnaja, i cili e ngjiti Partizanin nga vendi i parafundit në të gjashtin, po përballet me presionin e rezultateve pas katër humbjeve në pesë sfidat e fundit. Aktualisht, të kuqtë ndodhen shtatë pikë larg zonës së rrezikut, por po aq pikë i ndajnë edhe nga vendi i katërt që mbahet nga Dinamo.
Nga ana tjetër, te Teuta situata mbetet e ndërlikuar për shkak të një serie prej tetë ndeshjesh radhazi pa fitore.
Skuadra durrsake ka grumbulluar vetëm gjashtë pikë përmes barazimeve gjatë kësaj ecurie, duke vënë në dyshim të ardhmen e trajnerit Enkelejd Dobi.
Distanca mes dy ekipeve është vetëm një pikë, ndërsa objektivi i përbashkët për të siguruar një vend në “Final Four” mbetet i vështirë për t’u arritur.
