Egnatia siguroi një arritje historike duke u kualifikuar në fazën e ligës të Conference League, pikërisht ashtu siç kishte premtuar.
Kjo ecuri e suksesshme në Evropë ka sjellë lajme mjaft pozitive edhe sa i përket koeficientit të klubit rrogozhinas në renditjen e UEFA-s.
Edhe nëse humbet të gjitha ndeshjet e mbetura në grup, Egnatia do të përfitojë të paktën 2.5 pikë shtesë për këtë sezon. Përmes këtij garantimi, kampionët e Shqipërisë do të arrijnë minimalisht kuotën e koeficientit 7 për edicionet e ardhshme.
Aktualisht, asnjë klub tjetër shqiptar nuk gëzon një shifër të tillë, pasi Partizani e humbi koeficientin 7.5 të ndërtuar ndër vite.
Rrogozhinasit do të përballen me ekipe si Midtjylland, Braga, U. Craiova, Aarhus, Lincoln Red Imps dhe Kauno Zalgiris. Me këto përballje në horizont, mundësitë mbeten të hapura për ta rritur akoma më shumë këtë koeficient evropian.
