Skënderbeu ka bërë dy afrime të rëndësishme në fundin e merkatos. Pas largimit të Charles Bismark, që kaloi te Vllaznia, korçarët kanë siguruar një tjetër sulmues.
Bëhet fjalë për Mario Gjatën, një emër i njohur për futbollin shqiptar. Futbollisti fierak së fundi ka qenë pjesë e Bylisit, ndërsa gjatë gjithë karrierës së tij është aktivizuar 81 ndeshje në Superiore, ku ka shënuar 12 gola si dhe 22 ndeshje në Kategorinë e Parë, ku e ka gjetur 6 herë rrugën e rrjetës.
25-vjeçari në të kaluarën ka veshur fanellën e shumë klubeve të rëndësishme si Apolonia, Dinamo, Teuta, Egnatia dhe Bylis.
Afrimi tjetër është Marcos Ramos. Braziliani është rikthyer në Korçë dhe do të jetë pjesë e juglindorëve në Kategorinë e Parë.
Sa i përket largimeve, Franklin Kamleu nuk do të jetë më pjesë e Skënderbeut. Mesfushori 21-vjeçar, i cili sezonin e shkuar u aktivizua 17 ndeshje me fanellën bardhekuqe në elitën e futbollit shqiptar, ka ndërprerë bashkëpunimin me klubin duke dalë futbollist i lirë.
