Emiliano Bonazzoli nuk është më trajner i Shirokës në Kategorinë e Dytë. Sipas raportimeve të gazetës “Shkodra Sport”, tekniku italian ka ndërprerë bashkëpunimin me presidentin Axhani dhe është larguar drejt Italisë. Klubi shkodran nuk ka lëshuar ende një komunikatë zyrtare për të sqaruar rrethanat e këtij largimi, por stërvitja e fundit e ekipit është drejtuar nga drejtori Ardit Mani.
Kjo lëvizje vjen përpara ndeshjes së rëndësishme në transfertë kundër Sopotit në Librazhd.
Largimi i Bonazzolit shënon trajnerin e katërt që largohet nga Shiroka gjatë këtij sezoni. Fillimisht ekipi u nis me Ardit Manin, i pasuar nga Matias Tatangelo dhe portugezi Andre Jasmins, ky i fundit qëndroi vetëm dy javë përpara se të transferohej në Oman.
Bordi drejtues pritet të vendosë brenda pak ditësh nëse skuadra do t’i besohet sërish Manit apo do të emërohet një trajner i ri.
