Aventura e Kleandro Lleshit te Tirana është mbyllur zrtarisht, pas një periudhe të shoqëruar me tensione jashtë fushës së blertë. Qendërmbrojtësi 26-vjeçar dhe klubi bardheblu kanë arritur marrëveshjen për ndërprerjen e bashkëpunimit, duke i dhënë fund një qëndrimi që zgjati më pak se një vit.
Largimi i liderit të prapavijës vjen pas një përplasjeje në gjyq mes lojtarit dhe klubit për shkak të pagave të prapambetura, një situatë që kishte krisur raportet mes palëve prej kohësh.
Vetë Lleshi e ka konfirmuar lajmin përmes një postimi të thjeshtë në rrjetet sociale, ku shkruan: “Faleminderit KF Tirana”.
Mbrojtësi u bashkua me kryeqytetasit në korrik të vitit 2025, menjëherë pasi la Laçin pas rënies së kurbinasve nga elita, por duket se problemet financiare te bardheblutë u bënë pengesë për vazhdimësinë e tij.
