Klubi i Tiranës ka zyrtarizuar afrimin e mesfushorit ofensiv nga Kosta Rika, Freddy Antonio Alvarez Rodriguez. Futbollisti 30-vjeçar i është bashkuar bardhebluve si lojtar i lirë pas përfundimit të kontratës me skuadrën e Liberisë.
Pas kryerjes së vizitave mjekësore, ai ka firmosur kontratën me klubin kryeqytetas. Alvarez ka nisur menjëherë stërvitjen nën drejtimin e trajnerit Ardian Nuhiu. Ky është përforcimi i dytë i Tiranës brenda të njëjtës ditë nga Kosta Rika.
Më herët, klubi prezantoi mbrojtësin Johan Enrique Cortes Alfaro. Futbollisti 26-vjeçar ka mbërritur në Shqipëri dhe ka nënshkruar kontratën pas vizitave mjekësore. Cortes Alfaro është bashkuar menjëherë me grupin në stërvitje. Të dy lojtarët do të jenë në dispozicion të stafit teknik për pjesën e mbetur të sezonit.
Aktualisht, Tirana ndodhet në vendin e fundit të renditjes në Superiore. Drejtuesit e klubit kanë nisur ndryshime në skuadër për shkak të rrezikut të rënies nga kategoria. Afrimet janë pjesë e strategjisë së merkatos së dimrit për përmirësimin e rezultateve.
