Gjatë kësaj periudhe të merkatos, sulmuesi shqiptar Mirlind Daku po kthehet në një nga emrat më të kërkuar në kampionatin rus.
Sipas gazetarit Andrey Pankov, Spartaku i Moskës është gati të paguajë klauzolën prej 11 milionë eurosh për kartonin e tij te Rubin Kazan.
Transferimi pritet të mbyllet sapo klubi kryeqytetas të arrijë marrëveshjen me futbollistin për kushtet personale. Duke marrë parasysh shifrën e lartë të klauzolës, edhe oferta financiare për 28-vjeçarin parashikohet të jetë mjaft e majme.
Sulmuesi e ka nisur mirë sezonin e ri duke shënuar menjëherë gol për ekipin e tij aktual. Përveç Spartakut, interesim të fortë për shërbimet e Dakut ka shfaqur edhe një tjetër ekip nga Moska, CSKA-ja.
Këta të fundit po ashtu janë shprehur të gatshëm për të mbuluar vlerën e lirimit të lojtarit nga kontrata. Tashmë mbetet për t’u parë se cila nga dy skuadrat e kryeqytetit rus do të arrijë të bindë sulmuesin kuqezi.
