Skënderbeu triumfoi 3-2 ndaj Korabit, në ndeshjen e javës së 10-të në Kategorinë e Parë.
Juglindorët e nisën ndeshjen shumë mirë, duke marrë avantazhin e dyfishtë, pas golave të shënuar nga Nasr në minutën e 20-të dhe Vangjeli në minutën e 22-të.
Megjithatë, dibranët nuk u dorëzuan dhe ia dolën të gjejnë barazimin. Morina ngushtoi diferencat në minutën e 35-të, ndërsa Marku barazoi shifrat në minutën e 76-të.
Në sekondat e fundit, korçarët ia dolën të shënojnë edhe golin e fitores me Çuçkën, për të marrë tre pikët që i shkëpusin në krye.
Skënderbeu mban vendin e parë me 25 pikë, ndërsa Korabi renditet i shtati me 10 pikë.
