Etnik Brruti ka bërë hapin e madh në karrierë, duke siguruar një transferim prestigjioz në kampionatin kroat.
Mesfushori 22-vjeçar i Malishevës ka arritur akordin me kampionët e Rijekës, skuadër së cilës do t’i bashkohet në verë si lojtar i lirë.
Pas një sezoni fantastik në Superligën e Kosovës, ku shënoi 6 gola dhe dhuroi 4 asistime, Brruti ka bindur drejtuesit e klubit kroat për të nisur aventurën e tij të parë jashtë kufijve.
Një rol kyç në këtë marrëveshje ka luajtur ish-lojtari i Kombëtares, Eros Grezda, tashmë në rolin e menaxherit.
Megjithëse vlera e tij në treg është rritur ndjeshëm, Malisheva nuk do të përfitojë financiarisht nga ky largim, pasi lojtari ka zgjedhur të mos rinovojë kontratën që skadon në fund të sezonit.
