Arsenali ka siguruar matematikisht titullin kampion në Premier League, duke i dhënë fund një periudhe pritjeje prej 22 vitesh. Ky sukses u konfirmua pas barazimit 1-1 të rivalit të tyre direkt, Manchester City, në fushën e Bournemouth-it.
Ky rezultat i lë “Topçinjtë” e drejtuar nga Mikel Arteta, katër pikë përpara skuadrës së Pep Guardiolës, kur ka mbetur vetëm një javë nga përfundimi i kampionatit. Arsenali do të zhvillojë ndeshjen e fundit të dielën ndaj Crystal Palace, ku do të bëhet edhe ngritja zyrtare e trofeut.
Sa i përket Cityt, sulmuesi adoleshent Junior Kroupi kaloi vendasit në avantazh me një goditje të saktë, duke shfrytëzuar hapësirat në mbrojtjen e ekipit të Guardiolës. Në pjesën e dytë, Manchester City rriti presionin dhe krijoi disa raste shënimi. Edhe pse sulmuesi Erling Haaland arriti të barazonte shifrat në minutat e fundit të takimit, Bournemouth-i rezistoi deri në vërshëllimën finale për të siguruar një pikë me mjaft vlerë.
Për trajnerin e Bournemouth-it, Andoni Iraola, i cili ka njoftuar vendimin për t’u larguar nga klubi në fund të sezonit, ky rezultat ka një rëndësi të veçantë. Pikërisht ky barazim siguron matematikisht pjesëmarrjen e Bournemouth-it në kompeticionet europiane për edicionin e ardhshëm, një arritje historike për klubin.
Ndërsa Manchester City fokusohet në ndeshjen e fundit të sezonit në atë që pritet të jetë paraqitja e fundit e Guardiolës në stol, vëmendja kryesore zhvendoset te festimet e Arsenalit, që kurorëzohet si skuadra më e qëndrueshme e këtij edicioni në Angli.
Ky është trofeu i 14-të në histori pë “Topçinjtë”, i cili vjen pas një sezoni të dominuar totalisht. Po ashtu Arsenali është edhe në finalen e Ligës së Kampioneve, ku do të përballet me PSG-në.
