Sipas përditësimit të fundit nga revista “Forbes”, biznesmeni shqiptar Samir Mane ka arritur një pasuri prej 1.9 miliardë dollarësh.
Me këtë shifër, ai renditet në vendin e 2.177-të në listën globale të njerëzve më të pasur në botë. Pasuria e tij rezulton të jetë më e lartë se ajo e Gerry Cardinale, pronarit të klubit të Milanit, i cili vlerësohet me 1.8 miliardë dollarë.
Para pak javësh, Mane u shfaq në një takim me Presidentin e FSHF-së, Armand Duka, ku u diskutua mundësia e investimit në futbollin vendas. Një përfshirje e mundshme e tij në drejtimin e një klubi shqiptar pritet të sjellë investime strategjike dhe zhvillim të akademive.
Fuqia e tij financiare shihet si një mundësi për të rritur standardet e transferimeve dhe përfaqësimit ndërkombëtar. Deri më tani, arritja më e madhe e klubeve shqiptare mbetet pjesëmarrja e Skënderbeut në fazën e grupeve të Europa League. Prezenca në Champions League mbetet një objektiv ende i paarritur për futbollin e klubeve në Shqipëri.
