Përplasja mes Flamurtarit dhe ish-kapitenit Lorenc Trashi ka hyrë në një fazë të re, pas deklaratave të fundit të presidentit Sinan Idrizi.
Kreu i klubit vlonjat ka konfirmuar se vendimi për përjashtimin e mbrojtësit do t’i komunikohet lojtarit me shkrim, duke iu përgjigjur kështu kërkesës së këtij të fundit.
Idrizi ironizoi paralajmërimet e Trashit për publikimin e fakteve komprometuese, duke e cilësuar lojtarin si një “djalosh” që do të marrë një përgjigje të detajuar.
“Sot do ta marrë vesh zyrtarisht ai me shkrim, edhe adresën e shtëpisë me postë elektronike ia çoj unë me shkrim, meqë e dashka me shkrim ai zotëria. Vendimin do ta kemi sot zyrtarisht, klubi i Flamurtarit është një klub serioz, nuk funksionon në bazë të thashehemeve të shtypi, kafeneve, fejsbukistëve. Është një klub që përpiqet të mbajë përsipër të gjitha përgjegjësitë. Siç i është përgjigjur çdo lojtari, për çfarëdo lloji halli familjar, përfshirë edhe zotin Trashi.
Kur kanë trokitur te klubi dhe presidenti… është një klub që mban dhe kërkon përgjegjësi për çdo gjë. Dhe çfarëdo lloji përgjegjësia, me shkrim ia përsëris këtij djaloshi që do na tregojë bombat që do shpërthejë ky, ky djalosh, ai do ta marrë me shkrim. Do të ketë një përgjigje shumë të detajuar sonte në darkë ai djalë. Kontrata aktuale me Trashin? Do ta merrni sot në darkë përgjigjen”, tha Sinan Idrizi për “Shqipëria Live” në Top Channel.
