Skuadra e Burnley-t po përgatitet për një reformë të thellë pas dështimit për të qëndruar në elitën e futbollit anglez.
Rënia në Championship pritet të sjellë largimin e trajnerit aktual, Scott Parker, ndërkohë që drejtuesit kanë nisur kërkimin për një pasues me peshë. Emri më i lakuar orët e fundit është ai i legjendës së Liverpool-it, Steven Gerrard, i cili shihet si njeriu i duhur për të nisur një cikël të ri.
Gerrard është aktualisht i lirë pasi mbylli aventurën e tij me Al-Ettifaq në Arabinë Saudite gjatë muajit janar.
Nëse kjo lëvizje realizohet, për Gerrard do të ishte përvoja e parë si trajner në kategorinë e dytë angleze, pas eksperiencës së mëparshme në Premier League me Aston Villa-n.
Ky ndryshim pritet me interes edhe nga sulmuesi i Kombëtares shqiptare, Armando Broja, i cili është pjesë e planeve të Burnley-t për sezonin e ardhshëm.
Konfirmimi i trajnerit të ri do të qartësojë edhe rolin që Broja do të ketë në projektin që synon rikthimin e menjëhershëm të klubit në majat e futbollit anglez.
