Mbrëmjen e sotme, në orën 19:00, Flamurtari do të presë skuadrën e Tiranës në stadiumin e Vlorës, ndeshje kjo e vlefshme për javën e 30-të të Kategorisë Superiore.
Të dyja ekipet kërkojnë pikët e nevojshme për të siguruar qëndrimin në elitën e futbollit shqiptar. Për të motivuar lojtarët, presidenti i vlonjatëve, Sinan Idrizi, raportohet se ka vënë në dispozicion një premio prej 100 milionë lekësh në rast se skuadra e drejtuar nga Andi Ribaj arrin të mposhtë bardheblutë.
Nga ana tjetër, Tirana e teknikut Orges Shehi vjen në këtë përballje pas një përgatitjeje intensive në ditët e fundit, me synimin për të dalë me rezultat pozitiv nga transferta vlonjate.
Skuadrat ndodhen në pozita të ngjashme në tabelën e klasifikimit, çka e bën këtë takim përcaktues për ecurinë e tyre në shtatë javët e mbetura të kampionatit. Ndeshja pritet të ndiqet me interes për shkak të rëndësisë që ka për renditjen e të dy klubeve.
