Sfida mes Vorës dhe Vllaznisë, e mbyllur në barazim pa gola, ka prodhuar një incident komik dhe të rrallë që ndodhi pas përfundimit të saj.
Protagonist u bë mbrojtësi i shkodranëve, Melos Bajrami, i cili fillimisht u shpall “Lojtari i Ndeshjes” dhe doli para mediave për të marrë çmimin dhe për të dhënë intervistën e zakonshme.
Megjithatë, gëzimi i tij ishte i shkurtër. Pas pak çastesh, organizatorët ndërhynë duke i hequr trofeun nga duart për t’ia dorëzuar futbollistit të Vorës, Mario Bajramaj.
Shkak për këtë “shkëmbim” të sikletshëm u bë një lapsus i delegatit të ndeshjes në shënimet e tij, i cili kishte ngatërruar mbiemrat e ngjashëm: Bajrami me Bajramajn.
Ky episod ka shkaktuar të qeshura dhe reagime të shumta në rrjetet sociale, duke u kthyer në momentin më viral të javës në futbollin shqiptar.
