Trajneri shkodran Armando Cungu po projektohet si një nga kandidatët kryesorë për të marrë drejtimin e skuadrës së Flamurtarit.
Tekniku 53-vjeçar, i cili numëron një përvojë të gjatë në futbollin shqiptar në stolin e klubeve si Vllaznia, Kukësi dhe Laçi, ka qenë edhe më parë në planet e presidentit Sinan Idrizi.
Pasi i është përkushtruar së fundmi fushës akademike si pedagog dhe rolit të anëtarit të Komitetit Ekzekutiv në FSHF, Cungu po konsideron rikthimin aktiv në rolin e trajnerit. Megjithatë, gara për stolin e kuqezinjve përfshin edhe dy emra të tjerë të njohur në kampin vlonjat.
Jeton Beqiri, ish-zëvendëstrajner i Flamurtarit në kohën e Shpëtim Duros, shihet si një alternativë e pëlqyer nga drejtuesit, ndonëse tekniku nga Maqedonia e Veriut raportohet të jetë njëkohësisht pranë një akordi me Gjilanin.
Në listën e kandidatëve bën pjesë edhe Eqerem Memushi, i cili e ka drejtuar ekipin në sezonin 2024-2025. Memushi gëzon një respekt të veçantë në Vlorë, sidomos për shkak të triumfit historik në Kupën e Shqipërisë në vitin 2009.
