Përballja mes Skënderbeut dhe Dinamos në qytetin e Korçës do të zhvillohet pa praninë e tifozëve në shkallët e stadiumit.
Skuadra bardhekuqe duhet të shlyejë dënimin e dhënë nga Komisioni i Disiplinës në fundin e edicionit të kaluar. Ky vendim u mor pas incidenteve të regjistruara në ndeshjen ndaj Laçit, ku Disiplina vendosi një dënim prej dy ndeshjesh pa spektatorë.
Sfida ndaj kryeqytetasve do të jetë e para nga dy takimet ku korçarët do të vuajnë këtë masë disiplinore. Mungesa e mbështetjes së publikut vendas konsiderohet si një goditje e ndjeshme për ekipin bardhekuq në këtë përballje.
Megjithatë, futbollistët e Skënderbeut do të kërkojnë të bëjnë një paraqitje pozitive për të marrë një rezultat pozitiv.
Takimi mes Skënderbeut dhe Dinamo City-t është programuar të luhet më 31 gusht, në orën 18:30, në stadiumin e Korçës. Pas kësaj sfide, mbetet për t’u parë se kur do të shlyhet ndeshja e dytë e dënimit për klubin korçar.
/CNA
