Tension dhe dhunë në Kategorinë e Dytë. Sfida mes Delvinës dhe Partizanit B, e zhvilluar në stadiumin “Delvina”, është shndërruar në një skenë tensioni që në minutat e para të takimit.
Incidenti i rëndë nisi në minutën e 20-të, kur futbollisti i Delvinës, Bastri Malaj, goditi me grusht lojtarin e Partizanit B, Envi Bocka.
Ky moment solli menjëherë përplasje mes dy kampeve, duke detyruar gjyqtarin Klajdi Qendraj të ndërpriste lojën për rreth 10 minuta deri në qetësimin e situatës.
Vendimi i arbitrit shkaktoi akoma më shumë polemika: Malaj, autor i goditjes, u ndëshkua vetëm me karton të verdhë, ndërsa kartoni i kuq iu tregua Lauren Ismailajt të Partizanit B, i cili ishte në stol dhe protestoi ashpër pas episodit.
Situata u përkeqësua edhe më shumë në pjesën e dytë, ku siguria në stadium dështoi pas futjes së tifozëve në fushën e lojës.
Këto incidente pritet të merren në shqyrtim nga Komisioni i Disiplinës, pasi integriteti i garës u cenua rëndë nga dhuna dhe mungesa e rendit.
