Skënderbeu fitoi me rezultatin e pastër 3-0 ndaj Luftëtarit në transfertë, në ndeshjen e vlefshme për javën e 24-t në Kategorinë e Parë.
Sukses i rëndësishëm për korçarët, që vazhdojnë marshimin në krye të renditjes, me synim, rikthimin në elitë.
Skënderbeu ishte më kërkues nga fillimi dhe e mbylli pjesën e parë në avantazh. Në minutën e 37-të, ishte i përhershmi, Saleh Nasr, i cili pas një topi të marrë në mesfushë, ia doli ta ndalë në fundin e rrjetës.
Mario Beshiraj dyfishoi shifrat në minutën e 74-t, duke dërguar në rrjetë një top të mbetur në zonë.
Ndeshjen e vulosi Aldi Gjumsi, i cili shënoi edhe të tretin në minutën e 95-të.
Me këtë sukses, Skënderbeu vazhdon i qetë në krye me 57 pikë, ndërsa Luftëtari mban vendin e parafundit me 19 pikë.
SHIKONI RENDITJEN: RENDITJA NË KATEGORINË E PARË
Në ndeshjet e tjera, Besa mori një fitore shumë të rëndësishme ndaj Burrelit me rezultatin 1-0. Kavajasit iu falën golit të shënuar nga Danaj në pjesën e parë.
Burreli renditet në vendin e gjashtë me 31 pikë, ndërsa Besa në vendin e shtatë me 28 pikë.
Kukësi nuk shkoi më shumë se barazimi 1-1 ndaj Ilirisë në transfertë. Bespallov i dha avantazhin verilindorëve në minutën e 12-të, por vendasit barazuan me Fofana në minutën e 55-të.
Kukësi mban vendin e fundit me 16 pikë, ndërsa Iliria renditet në vendin e pestë me 33 pikë.
