Dinamo City ka arritur marrëveshjen për të kryer transferimin e parë të rëndësishëm gjatë kësaj periudhe të merkatos së verës.
Skuadra kryeqytetase ka siguruar shërbimet e sulmuesit të krahut të majtë, Almir Ajzeraj, i cili vjen pas mbylljes së bashkëpunimit me skuadrën e Dritës në Kosovë.
Futbollisti 28-vjeçar posedon një vlerë tregu që llogaritet rreth 500 mijë euro. Për lojtarin dardan ky kalim nuk përbën një eksperiencë të re në futbollin shqiptar, pasi më herët ka qenë pjesë e organikës së Skënderbeut.
Drejtuesit e klubit blu e shikojnë anësorin ofensiv si një përforcim me vlerë për të rritur cilësinë në repartin e avancuar.
Me këtë lëvizje të parë të konkretizuar, Dinamo nis zyrtarisht ndërtimin e grupit të lojtarëve për edicionin e ri futbollistik.
