Klubi i Partizanit është duke punuar për të zgjidhur çështjen e trajnerit të ri për edicionin futbollistik 2026-2027.
Pas zyrtarizimit të kalimit të kandidatit kryesor, Zoran Zekiç, te skuadra e Sarajevës në Bosnje, drejtuesit e kuq kanë kthyer sytë nga alternativa të tjera në tregun e huaj, me fokus të veçantë te tregu ballkanas.
Aktualisht bisedimet janë përqendruar te një tjetër teknik kroat, identiteti i të cilit mbahet ende konfidencial, ndërsa zhvillime më konkrete pritet të ketë në fillim të javës së ardhshme.
Në listën e diskutimeve ka qenë edhe emri i ish-trajnerit të Vllaznisë, Qatip Osmani, i cili vlerësohet për përvojën e tij të madhe me Shkëndijën e Tetovës dhe Shkupin, por për momentin pista kroate mbetet prioriteti kryesor. Megjithatë, një faktor përcaktues në negociata mbetet aspekti financiar.
Pasi Partizani nuk arriti të kualifikohej në Kupat e Europës për këtë sezon, klubi do të ketë mungesë të të ardhurave nga UEFA, çka i detyron drejtuesit kryeqytetas të tregohen mjaft të kujdesshëm me menaxhimin e buxhetit të ri përpara se të hidhet firma mbi kontratë.
