Dinamo do të jetë e detyruar të luajë të dielën kundër Vorës në javën e parë të kampionatit, pavarësisht kërkesës drejtuar FSHF-së për shtyrjen e takimit.
Kryeqytetasit kërkuan më shumë kohë përgatitjeje për shkak të ngarkesës nga sfidat ndërkombëtare, por kërkesa e tyre nuk u pranua nga FSHF.
Skuadra e drejtuar nga Ilir Daja vjen pas kualifikimit për në fazën “play-off” të Ligës së Konferencës, ku mposhti Audën në “Elbasan Arena”. Në turin tjetër, Dinamo do të përballet me Pafosin, me ndeshjen e parë të programuar për t’u zhvilluar të enjten në Elbasan.
Ndryshe nga sezoni i kaluar kur përballja ndaj Teutës u shty dy herë, këtë herë nuk do të ketë ndryshime në kalendar. Trajneri Daja do të duhet të menaxhojë me kujdes organikën për të përballuar të dyja përballjet brenda pak ditëve.
