Mesfushori dhe kapiteni i Egnatias, Albano Aleksi, pritet të largohet nga skuadra rrogozhinase pas transferimit më të fundit të Ledio Beqjas, i cili është projektuar si zëvendësuesi i tij në pozicionin e qendërmbrojtësit të mesfushës, sipas Panorama Sport.
Largimi i 33-vjeçarit ka zgjuar interesin e disa klubeve të njohura të Kategorisë Superiore. Tirana, Vllaznia dhe Teuta janë shfaqur si destinacionet e mundshme për lojtarin, i cili ka pasur eksperienca të mëparshme në kryeqytet dhe në Durrës, ndërsa lëvizja drejt Shkodrës mbetet një mundësi e re.
Ndeshja e fundit e Aleksit me fanellën e Egnatias ishte ajo kundër Petrokub në kuadër të turit të parë të Ligës së Kampionëve, ku u ndëshkua me karton të kuq në fund të pjesës së parë, por ekipi rrogozhinas arriti gjithsesi të siguronte kualifikimin për në fazën pasardhëse.
