Mesfushori Sherif Kallaku ka mbyllur bashkëpunimin me skuadrën e Vllaznisë për të nisur një etapë të re te Teuta.
Palët kanë arritur akordin e plotë dhe 28-vjeçari pritet të vihet menjëherë nën urdhrat e trajnerit Edlir Tetova. Megjithëse drejtuesit e klubit shkodran fillimisht kishin njoftuar rinovimin e kontratës edhe për një vit tjetër, bisedimet e fundit sollën lejimin e largimit të futbollistit.
Ky transferim shënon rikthimin e radhës së lojtarit në qytetin bregdetar, ku ka kontribuar në disa periudha të ndryshme përgjatë karrierës së tij. Më parë, ai ka mbajtur veshur këtë fanellë gjatë viteve 2018-2020, si dhe në faza të shkurtra përgjatë viteve 2021 dhe 2023.
Gjatë përvojës së tij të parë me ekipin durrsak, mesfushori arriti të fitonte edhe titullin kampion në edicionin 2019/2020. Tashmë pritet vetëm zyrtarizimi i marrëveshjes nga ana e klubit të ri.
