Gjatë ndeshjes së vlefshme për kualifikueset e Kupës së Botës 2026 mes Serbisë dhe Anglisë, e zhvilluar në stadiumin “Rajko Mitić” të Beogradit, është regjistruar një skandal në tribuna.
Tifozët serbë kanë shpalosur një banderolë me hartën e Kosovës të mbuluar nga ngjyrat e flamurit serb.
Gjithashtu, në stadium janë dëgjuar vazhdimisht thirrje “Kosova është Serbi”.
Ky veprim shihet si një përsëritje e incidenteve të mëparshme në ndeshje ndërkombëtare të organizuara nga UEFA dhe FIFA.
Federata e Futbollit të Kosovës pritet të paraqesë një ankesë zyrtare në UEFA për këtë rast.
Institucionet ndërkombëtare të futbollit e kanë trajtuar më herët këtë çështje si shkelje të rregullave të sjelljes së tifozëve.
Federata Serbe ishte paralajmëruar nga FIFA për mundësinë e dënimeve të rënda në rast përsëritjeje të akteve të tilla.
Incidenti i fundit rrezikon të sjellë masa ndëshkuese ndaj Serbisë.
Një prej dënimeve të mundshme është mbyllja e stadiumit për ndeshjet e ardhshme.
Ndeshja e radhës në këtë stadium është ajo mes Serbisë dhe Shqipërisë, në kuadër të kualifikueseve të Botërorit.
Ky takim tashmë konsiderohet me rrezik të lartë përsa i përket sigurisë dhe organizimit dhe ekziston mundësia që të luhet pa tifozë.
