Mesfushori Regi Lushkja është rikthyer në Shqipëri duke iu bashkuar skuadrës së Egnatias në seancat stërvitore, pas ndërprerjes së kampionatit iranian.
29-vjeçari, i cili aktivizohet me ekipin e Tractor, ka vendosur të largohet përkohësisht nga Irani për shkak të situatës së tensionuar në Lindjen e Mesme.
Për momentin, prania e tij te rrogozhinasit shërben vetëm për të mbajtur formën fizike deri në një vendim të dytë për vijimin e sezonit. Lushkja u transferua te Tractor verën e kaluar për shifrën e 250 mijë eurove, pikërisht nga radhët e kampionëve në fuqi të Shqipërisë.
Gjatë karrierës së tij, ai ka mbajtur veshur edhe fanellat e Tiranës, Laçit dhe Besës së Kavajës. Mbetet ende e paqartë nëse kjo periudhë stërvitore do të shndërrohet në një rikthim zyrtar te Egnatia apo lojtari do të presë udhëzimet e FIFA-s.
Situata e tij është e ngjashme me atë të Jasir Asanit, duke pritur qartësimin e kontratave në zonat e konfliktit.
