Berat Lush është një futbollist 18-vjeçar që ndodhet në planet e Shqipërisë U-21.
Trajneri Alban Bushi ka kohë që po zhvillon bisedime për ta bindur sulmuesin të veshë fanellën kuqezi.
Lush është rritur te akademia e Galatasaray-t, ndërsa këtë sezon është huazuar te Erokspor në Kategorinë e Parë turke. Ai ka lindur në Stamboll, por familja e tij është me origjinë nga Gostivari i Maqedonisë së Veriut.
Në ndeshjen e fundit të kampionatit turk, Erokspori fitoi 5-0 ndaj Istanbulspor. Në këtë takim, Lush shënoi katër gola, duke spikatur me paraqitjen e tij.
Një prej tyre e festoi duke bërë simbolin e shqiponjës. Ky gjest u interpretua si një mesazh për lidhjen e tij me origjinën shqiptare.
