Shqipëria është bërë skuadra e parë europiane që siguron praninë në play-off të Botërorit 2026 pas fitores ndaj Andorrës. Kuqezinjtë janë matematikisht në vendin e dytë të Grupit K dhe tashmë përgatiten për ndeshjet e muajit mars.
Në ditët në vijim pritet të përcaktohet edhe pozicionimi i Shqipërisë në short, konkretisht nëse do të jetë në vazon e dytë apo të tretë, në varësi të renditjes së FIFA-s për ekipet e kualifikuara.
Vazoja e dytë ofron avantazhin e zhvillimit të ndeshjes së parë të play-off në shtëpi, ndaj një kundërshtari të pozicionuar në vazon e tretë. Situata aktuale e vazove ka ndryshuar pas rezultateve të fundit dhe pozicionimi i Islandës përpara Ukrainës ka ndikuar edhe në renditjen e Shqipërisë.
Sipas konfigurimit aktual, kundërshtarët potencialë të Shqipërisë në play-off janë Maqedonia e Veriut, Islanda, Bosnjë Hercegovina dhe Kosova.
Ky skenar mund të pësojë ndryshime në varësi të takimeve të mbetura në fazën kualifikuese. Nëse renditja mbetet e pandryshuar, Shqipëria do të siguronte zhvillimin e ndeshjes së parë të play-off në fushën e vet. Aktualisht, vazot janë të strukturuara si më poshtë:
VAZOT:
VAZO 1: Itali, Turqi, Poloni, Hungari
VAZO 2: Skoci, Çeki, Sllovaki, Shqipëri
VAZO 3: Maqedoni e Veriut, Islandë, Bosnjë Hercegovinë, Kosovë
VAZO 4: Uells, Rumani, Suedi, Irlandë e Veriut
