Trajneri i Barcelonës, Hansi Flick, po mendon të largohet në fund të këtij sezoni, sipas asaj që raportohet nga gazeta spanjolle “ABC”. Arsyeja kryesore lidhet me lodhjen e tij nga sjelljet dhe mungesa e disiplinës së disa futbollistëve, veçanërisht të të riut Lamine Yamal.
Flick thuhet se u ka rrëfyer bashkëpunëtorëve të tij se ndjen mungesë mbështetjeje nga klubi për të vendosur rregull dhe disiplinë në skuadër. Një nga rastet që ka shkaktuar pakënaqësi ka qenë udhëtimi i papritur i Yamal në Milano pas humbjes në “El Clásico”.
Po ashtu, deklaratat e lojtarit para ndeshjes me Real Madridin janë parë si të papërshtatshme nga stafi teknik.
Një tjetër burim shqetësimi për Flick janë rastet kur disa lojtarë shkelin rregullat e brendshme, si përdorimi i automjeteve elektrike të destinuara vetëm për stafin. Situata, sipas raportimit, ka krijuar te trajneri përshtypjen se autoriteti i tij në grup po zbehet dita-ditës.
