Shqipëria do të luajë më 13 nëntor në transfertë ndaj Andorrës dhe më pas, më 16 nëntor, do të presë Anglinë në “Air Albania”. Këto dy ndeshje do të jenë vendimtare për ecurinë në eliminatoret e Botërorit, pasi me një fitore në Andorra, kuqezinjtë mund të sigurojnë një vend në “Play Off”.
Deri tani, skuadra e Silvinjos ka zhvilluar një fushatë pozitive, me barazimin 1-1 në Letoni si rezultatin më zhgënjyes. Në atë takim, Shqipëria luajti me skemën 4-3-3, të cilën trajneri e përdori sërish në fitoren 1-0 ndaj Serbisë në Leskovc. Ndryshe nga sfida në Letoni, ku loja ishte e vakët, ndaj Serbisë kuqezinjtë u paraqitën bindshëm, duke qenë solidë në mbrojtje dhe më krijues në sulm.
Silvinjo ka përdorur gjithashtu skemën 4-2-3-1 në tre ndeshje kualifikuese, ku janë regjistruar dy fitore dhe një barazim. Ky rreshtim është përdorur vetëm në ndeshjet në shtëpi, ndërsa 4-3-3 është aplikuar në transfertë. Ndërkohë, formacioni 4-1-4-1 është përdorur vetëm një herë, në humbjen 2-0 ndaj Anglisë.
Për sfidat e nëntorit, pritet që Silvinjo të zgjedhë mes stabilitetit të 4-2-3-1 dhe fleksibilitetit të 4-3-3, në varësi të kundërshtarit dhe kushteve të ndeshjes. Rezultatet e këtyre dy takimeve do të përcaktojnë përfundimisht fatin e Shqipërisë në këto eliminatore.
