Achraf Hakimi ka shmangur më të keqen pas dëmtimit të rëndë që pësoi në ndeshjen kundër Bayern Munich.
Mbrojtësi maroken i Paris Saint-Germain u detyrua të largohej nga fusha me ndihmën e stafit mjekësor, pasi pësoi një lëndim të fortë në kyçin e këmbës pas një ndërhyrjeje të Luis Díaz.
Pamjet ku ai shfaqej me paterica shtuan shqetësimin për gjendjen e tij, por kontrollet mjekësore sollën lajme pozitive.
Sipas “Marca” dhe “AS”, Hakimi nuk ka frakturë dhe nuk do t’i nënshtrohet operacionit. Lojtari do të qëndrojë jashtë fushave për rreth dy muaj, për t’u rikuperuar plotësisht.
Kthimi i tij në stërvitje pritet të ndodhë në fillim të vitit 2026. Për pasojë, ai rrezikon të mungojë në Kupën e Kombeve të Afrikës, që nis më 21 dhjetor.
