Sulmuesi Dejvi Bregu ka vendosur të rinovojë kontratën e tij me skuadrën e Dinamo City-t.
30-vjeçari vlonjat ka surprizuar tregun e transferimeve duke refuzuar ofertat e rëndësishme që kishte në tavolinë.
Skuadra e Teutës kishte shfaqur një interes të madh dhe kishte përgatitur një propozim të lartë financiar për të siguruar shërbimet e tij.
Megjithatë, dëshira e lojtarit për të vijuar projektin në kryeqytet ka peshuar më shumë në vendimin e tij përfundimtar.
Bregu konfirmohet kështu si një nga pikat kyçe të organikës dhe i preferuari i presidentit Adrian Bardhi për sezonin e ri. Nga ana tjetër, ky dështim në bisedime përbën një goditje të dytë radhazi për merkaton e klubit durrsak.
Pas dështimit për të siguruar portierin Martin Janaçek, Teuta e sheh veten sërish pa një nga objektivat kryesorë të verës.
