Mbrojtësi shqiptar Elseid Hysaj është pranë arritjes së një marrëveshjeje me klubin e Lecces për të vazhduar karrierën e tij në Serie A.
Pas përfundimit të kontratës me Lazion, 32-vjeçari është aktualisht lojtar i lirë dhe negociatat mes përfaqësuesve të tij dhe klubit nga Puglia janë në fazë të avancuar.
Drejtuesit e Lecces synojnë të shfrytëzojnë përvojën e gjatë të mbrojtësit kuqezi për të përforcuar repartin defensiv përpara fillimit të sezonit të ri.
Hysaj mbylli së fundmi një aventurë pesëvjeçare te Lazio, ku luajti 131 ndeshje në të gjitha garat, ndonëse në edicionin e fundit u aktivizua në vetëm pesë takime kampionati.
Karriera e tij është zhvilluar tërësisht në Itali, duke nisur nga Empoli, për të vijuar më pas me gjashtë sezone te Napoli dhe pesë te Lazio. Nëse ky kalim zyrtarizohet, ai do të bëhet bashkëlojtar me mesfushorin e kombëtares shqiptare, Medon Berisha.
Ky transferim shihet si një mundësi e rëndësishme për Hysajn për të gjetur më shumë minuta aktivizimi në elitën e futbollit italian.
