Partizani ka vendosur të mbajë në skuadër sulmuesin Albers Keko, duke aktivizuar zyrtarisht klauzolën për zgjatjen e kontratës së tij deri në verën e vitit 2027.
Sulmuesi 24-vjeçar ka lënë pas një dëmtim të rëndë të pësuar vitin e kaluar në ndeshjet europiane, i cili e mbajti jashtë fushave për një kohë të gjatë.
Rikthimi i tij në fund të këtij sezoni rezultoi i suksesshëm dhe produktiv për ekipin kryeqytetas. Në përballjen e tij të parë si titullar, Keko realizoi dy gola përballë Dinamos, duke ndikuar drejtpërdrejt në humbjen e skuadrës së Ilir Dajës në garën për titull.
Formën e mirë sulmuesi e konfirmoi edhe në miqësoren e fundit, ku shënoi sërish dy gola në fitoren 3-1 kundër Vorës. Drejtuesit e kuq i kanë besuar lojtarit një rol të rëndësishëm në projektin e ri, duke kujtuar që kartoni i tij u ble nga Korabi në vitin 2023.
