Trajneri Orges Shehi ka nisur një aventurë të re në krye të pankinës së skuadrës së Prishtinës.
Ky emërim shënon rikthimin e teknikut në kampionatin e Kosovës, ku në të kaluarën ka regjistruar një periudhë suksesi në drejtimin e Ballkanit. Akordi mes palëve u arrit menjëherë pas largimit të tij nga Tirana, skuadër të cilën e mori në merkaton e dimrit dhe e udhëhoqi drejt sigurimit të mbijetesës.
Përpjekjet për rinovimin e kontratës në kryeqytetin shqiptar dështuan për shkak të mosmarrëveshjeve në aspektin financiar. Mësohet se Shehi do të përfitojë një pagë mujore prej 10 mijë eurosh te klubi i tij i ri.
Tashmë, misioni kryesor i trajnerit do të jetë ndërtimi i një grupi konkurrues për arritjen e objektivave madhorë. Drejtuesit e Prishtinës kanë shprehur besim të plotë te aftësitë e tij për të rikthyer skuadrën te trofetë.
