Vllaznia ka arritur marrëveshjen për transferimin e mesfushorit qendror Erlis Xhemajli, si përpjekje për të plotësuar hapësirat e lëna në atë repart pas largimeve të fundit të disa lojtarëve.
Sipas “Superliga Shqiptare”, 22-vjeçari ka gjetur akordin total për t’u transferuar në Shkodër. Futbollisti vjen pas dy sezonesh të suksesshme te skuadra e Dukagjinit në Kosovë, ku gjatë këtij edicioni arriti të fitonte edhe trofeun e Kupës.
Xhemajli, i cili ka pasur një rrugëtim edhe me ekipet e moshave të përfaqësueses së Kosovës, shihet si një përforcim me mjaft vlerë për organikën kuqeblu.
Drejtuesit shkodranë synojnë që përmes kësaj lëvizjeje të kthejnë stabilitetin në mesin e fushës përpara fillimit të kompeticioneve të reja.
